Augas da Galiza, organismo dependente da Xunta da Galiza, coa colaboración de Alcoa, Endesa, Iberdrola, PHG e Naturgy, deu hoxe a saída ás probas de activación das sirenas de alerta á poboación que reside en núcleos próximos aos encoros con Plan de emerxencia.
“Non afectan á actividade diaria dos veciños, pero nalgunhas zonas poden ser audíbeis”, informa o Goberno galego nun comunicado de prensa en que advirte de que “con esta revisión preténdese garantir a operatividade e que a poboación das zonas augas abaixo recoñeza o son”.
Na xornada de hoxe activáronse nove das 32 sirenas previstas e na terza feira continuarase coas restantes e tamén cos sinais de alerta adscritos ao depósito de lodos vermellos en Xove.
A importancia de recoñecer o son
Os obxectivos pasan por garantir a operatividade dos sistemas e por que a poboación das zonas afectadas recoñeza o son da sirena de aviso de evacuación.
Hai precisamente un mes, o 20 de maio, soaban as alarmas do Plan de emerxencias de Eiras, o encoro que abastece o suroeste da Galiza, para probar o son ante posíbeis roturas ou desbordamento na presa. Uns sinais que se deixaron notar no concello de Soutomaior.
A Xunta informa de que na Galiza hai actualmente 45 plans de emerxencia de encoros aprobados.
As finalidades destas follas de ruta pasan por “ter definidas” as estratexias para facer fronte a situacións que comporten risco de rotura ou avaría grave, coñecer as zonas que quedarían anegadas en caso de desbordamento, e ter previstos os sistemas de aviso tanto á poboación, como aos organismos xestores de emerxencias.
Presas cuxa concesión explota Naturgy
9 horas: Vilgaduín (Tordoia)
9.30 horas: San Cosmade (Cerceda, Ordes)
10.45 horas: Portodemouros (Vila de Cruces, Arzúa)
11.15 horas: Brandariz (Touro, Vila de Cruces)
15 horas: Belesar (Chantada, O Saviñao, Carballedo e Pantón)
Presas das que é concesionaria Iberdrola
10 horas: Chandrexa (Chandrexa de Queixa)
10.05 horas: Guístolas (Trives, Ribas de Sil)
10.15 horas: Santa Eulalia (O Bolo, Petín, Ribas de Sil)
10.30 horas: Santo Estevo (Pantón, Sober)
10.40 horas: San Pedro (Pantón, Carballedo, Nogueira de Ramuín, A Peroxa, Coles, Pereiro de Aguiar, San Pedro
11 horas: San Martín (Quiroga, Ribas de Sil)
11.15 horas: Montefurado (Quiroga, Ribas de Sil, A Rúa, Petín)
11.30 horas: Sequeiros (Quiroga, Ribas de Sil)
11.45 horas: Casoio (Carballeda, O Barco)
12 horas: Pumares (Carballeda, O Barco)
12.15 horas: Cenza (Viana do Bolo, Vilariño de Conso)
12.30 horas: As Portas (Viana do Bolo, Vilariño de Conso)
12.45 horas: O Bao (Manzaneda, O Bolo, Petín, Ribas de Sil)
Presas das que é concesionaria Endesa
10 horas: Prada (A Veiga, O Bolo)
11 horas: Penarrubia (Rubiá)
12 horas: San Sebastián (Viana do Bolo, Vilariño de Conso)
Presa que explota PHG
10 horas: Touro (Vila de Cruces, Touro e Silleda)
Balsas de Alumina
11 horas: Riocobo e dique (Cervo, San Cibrao)
10 horas: Depósito de lodos (Xoves)