“Verdade e xustiza”. Isto é o que, máis unha vez, demandan as vítimas e familiares das vítimas do accidente ferroviario de Angrois, do que se cumpren dous anos o vindeiro 24 de xullo. A Plataforma Vítimas do Alvia convoca unha reunión na praza do Obradoiro para o 24 de xullo ás 11h co fin de amosar “a nosa disconformidade e indignación polo trato que estamos as sufrir as vítimas e a negativa a crear unha comisión de investigación parlamentaria para que se depuren responsabilidades políticas”.
Ao longo destes dous anos, PP e PSOE bloquearon en reiteradas ocasións as iniciativas presentadas, sinaladamente polo BNG, tanto no Parlamento como no Congreso para crear unha comisión que investigue o maior sinistro da historia de Galiza e que depure as responsabilidades políticas que houber.
Pola tarde, despois dun acto relixioso, a plataforma organiza unha marcha desde a Colexiata do Sar até a curva da Grandeira, onde descarrilou o Alvia. Alí terá lugar unha ofrenda floral en memoria das persoas falecidas.
Para o día 23 vítimas e familiares convocan unha asamblea xeral no Pazo de Faramello para repasaren todas as acción políticas e xudiciais que se adoptaron nestes dous anos.