O verán climatolóxico de 2022 na Galiza foi "extremadamente" cálido no que atinxe ás temperaturas, cos valores medios máis altos da serie histórica. A este balance, publicado polo Goberno galego este sábado, contribuíu especialmente o mes de xullo, marcado por varios episodios de calor extrema.
Así se conclúe no resumo do informe climatolóxico de Meteogalicia sobre o último trimestre, elaborado a partir dos datos das estacións máis representativas do país e tendo en conta a súa evolución durante o período de referencia 1981-2010.
A media das temperaturas no conxunto do período situouse en 20,7 graos, é dicir, 1,6 graos por riba do habitual. A estación climatolóxica acabou rexistrando no seu conxunto as temperaturas medias e máximas máis elevadas de toda a serie histórica.
Por meses, xullo foi extremadamente cálido e a temperatura media alcanzou os 22,4 graos, cunha anomalía de +2,7 graos a respecto dos valores históricos rexistrados nas estacións meteorolóxicas máis representativas.
Agosto mantívose nesta liña debido á persistencia das situacións anticiclónicas, "sendo no seu conxunto un período moi cálido". O único mes que se desmarcou desta tónica xeral foi o de xuño, marcado por unha gran variabilidade de situacións meteorolóxicas e os contrastes entre xornadas extremadamente cálidas e secas cun comezo e un final de mes con predominio de temperaturas frías, polo que finalmente resultou ser un período normal.
Diferenzas xeográficas
Por áreas xeográficas, os termómetros presentaron certas diferenzas. Así, mentres a media galega ficou nos 20,7 graos, no macizo ourensán de Manzaneda e na serra do Xistral rexistráronse os valores máis baixos, na contorna dos 14,7 graos. Nas beiras do río Sil, os termómetros alcanzaron unha media de 24 graos.
No que respecta á choiva, a Galiza viviu no seu conxunto un trimestre dentro da normalidade. As precipitacións medias para as 16 estacións meteorolóxicas de referencia foron de 117 litros por metro cadrado, só 2% máis do esperado para este período, polo que o verán considérase, no seu conxunto, normal.
Xuño foi o único mes do período caracterizado como húmido polas choivas rexistradas durante a primeira semana e os últimos dez días. De feito, o balance mensual foi de 86 l/m2, o que significa que choveu 78% máis do previsto, atendendo aos datos históricos de referencia.
A partir de xuño, a situación cambiou, xa que predominou o tempo anticiclónico. Isto fixo que as choivas rexistradas fosen escasas, cun déficit pluviométrico de 66% a respecto do habitual. O verán climatolóxico finalizou cun agosto seco, no que se mantivo a tónica do mes anterior, cunha anomalía das precipitacións esperadas para esta época do ano de 39%.
A repartición da choiva rexistrada durante todo o trimestre non foi homoxénea no conxunto do país. Así, os valores máis altos concentráronse localmente na Mariña occidental, con case 340 l/m2 acumulados entre xuño e agosto.
