A plataforma Así Eólicos Non vén de manter unha xuntanza co Goberno local de Cerdedo-Cotobade en relación aos 14 proxectos eólicos que axexan o municipio.
Nesta liña, as representantes do colectivo demandaron ao Concello que inste as entidades competentes (Augas da Galiza, Patrimonio, Medio ambiente, etc…) a emitiren "informes técnicos rigorosos e completos sobre todos os ámbitos afectados", así como a presentación de alegacións rexeitando o parque dos Cotos, actualmente en fase de exposición pública.
Tamén solicitan que se inclúa nas reunións nas que se está a abordar esta problemática a Comunidade de Montes de Augasantas, "xa que é unha parroquia afectada polos diferentes impactos" deste parque eólico.
Esta plataforma veciñal, salientan, é "autónoma" e "non só traballa en contra do parque dos Cotos", senón "para defender todo o Concello desta invasión eólica".
Mobilización social
"Desde a plataforma comunicamos que secundaremos a concentración que o Concello quere convocar o 9 de xaneiro en Cerdedo-Cotobade, mais tamén lle transmitimos a importancia de levar tal concentración ás portas da Xunta convocando outra concentración na Subdelegación da Xunta en Pontevedra, proposta coa que non se quixo comprometer", lamentaron, a través dun comunicado.
Esta concentración decorrerá o vindeiro 9 de xaneiro ás 12 horas, no Chan de Carballedo.
Parque eólico dos Cotos
O proxecto que actualmente se atopa en fase avanzada de tramitación, o parque eólico dos Cotos, está promovido pola sociedade Tiraventos SL, e prevé instalar seis aeroxeradores que sumarían unha potencia de 30 megawatts (MW).
