Así o traslada nun expediente de oficio aberto pola institución no que se analiza o informe presentado polo concello no que se especificaban as medidas tomadas nas festas da Maruxaina, así como as empresas contratadas -á vez que se admitía a posibilidade de "dotar de máis casetas sanitarias para futuros eventos"-.
A valedora do Pobo chega á conclusión de que é "necesario" un "cambio de actitudes" e "garantir a seguridade de mulleres e nenas" nas vilas e cidades.
Por esta razón, alude a unha localización e acceso aos aseos públicos que "necesariamente, ten que ser segura".
Tamén lembra un informe elaborado pola Asociación de Festivais de Música en colaboración con Gabeiras e Asociados, iniciativa que foi parcialmente subvencionada pola Dirección Xeral de Industrias Culturais e o Ministerio de Cultura e Deporte, no que se asegura que "a cantidade de cabinas instaladas" en espectáculos públicos "van moi axustadas a unha normativa desenvolvida en 1982 e que está desactualizada".
Todo isto ocorre tras o arquivo provisional dun xulgado de Viveiro das denuncias presentadas, que provocou o impulso de recursos por parte da Asociación de Mulleres en Igualdade de Burela (Bumei) -que exerce de acusación popular- así como de varias afectadas a título particular e de entidades como o Consello Galego das Mulleres.
No texto presentado por Fernández Galiño, afírmase que a realidade que se contempla demostra que "aínda existe quen non repara, e moi gratuitamente, de maneira premeditada e indiscriminada, provocar a humillación" ás mulleres "só por selo", cunha invasión da súa intimidade "evidente".
Con todo, apela a non confundir "a responsabilidade de quen se comportou así" coa da Administración, aínda que afirma que en eses eventos "o problema pode darse, como se deu".