O funeral da recentemente falecida Isabel II ten lugar esta segunda feira en Londres. A que era a monarca máis lonxeva do mundo será enterrada xunto ao seu marido, o duque de Edimburgo.
Ante este funeral, moita xente comezou a cuestionarse se o rei emérito, Juan Carlos I, asistiría a dito enterramento e, de facelo, se o faría en calidade de ex xefe de Estado ou como un particular.
O pagamento da viaxe
Tamén se comezou a especular se a Casa Real española lle pagaría a viaxe e o aloxamento así como se se vería cos membros da súa familia na capital inglesa.
Pois ben, segundo confirmaron fonte da Zarzuela esta sexta feira, o rei emérito viaxará "polos seus propios medios" a Londres para asistir ao funeral de Isabel II, mentres que Felipe VI e Letiza, acompañados por Dona Sofía, voarán nun avión da Forza Aérea española.
Juan Carlos I, que reside en Emiratos Árabes Unidos desde agosto de 2020, foi convidado expresamente pola familia real británica ao funeral, mais o Goberno xa deixara claro de antemán que non formaría parte da delegación oficial, na cal tamén figura o ministro de Exteriores, José Manuel Albares, que acompañará os monarcas actuais.
Dona Sofía e o emérito durmirán no mesmo hotel
Durante a súa estancia en Londres, os reis aloxaranse na residencia do embaixador español no Reino Unido, José Pascual Marcos, mentres que por "razóns de carácter loxístico e organizativo" Dona Sofía instalarase no mesmo hotel no que estará aloxado Juan Carlos, precisaron as fontes de Zarzuela.
