O verán climatolóxico de 2022 na Galiza foi "extremadamente" cálido no que atinxe ás temperaturas, cos valores medios máis altos da serie histórica. A este balance, publicado polo Goberno galego este sábada semana pasadao, contribuíu especialmente o mes de xullo, marcado por varios episodios de calor extrema.
A media das temperaturas no conxunto do período situouse en 20,7 graos, é dicir, 1,6 graos por riba do habitual. A estación climatolóxica acabou rexistrando no seu conxunto as temperaturas medias e máximas máis elevadas de toda a serie histórica. Unha situación con múltiples consecuencias, desde secas e falla de auga, até o incremento da mortaldade.
O Sistema de monitorización da mortalidade por todas as causas (MoMo) do Instituto Carlos III recolle día a día as persoas falecidas no Estado . Unha estatística na que contempla aqueles falecementos atribuíbeis á temperatura.
Mulleres
O estudo recolle como na Galiza 337 persoas perderon a vida nos meses de xuño, xullo e agosto como consecuencia desa suba de temperaturas. A maioría delas, mulleres, 196, o que representa 58%.
Xullo, mes no que se rexistraron varias vagas de calor, foi o mes con máis falecementos, 137, unha medida de catro cada día. En agosto perderon a vida 78 persoas por esas causas e en xullo, 14.
No que vai de ano, entre xaneiro e setembro, as mortes que se atribúen á temperatura son 774, número moi superior ás 304 rexistradas en todo 2021 e ás 134 en 2020.
A relación entre a calor extrema e a mortaldade
Julio Díaz, codirector da Unidade de Cambio Climático, Saúde e Medio Ambiente Urbano do Instituto de Saúde Carlos III, explica que "a mortalidade que se atribúe á calor moi poucas veces é directamente por un golpe de calor".
O que realmente fai a calor, afirma, "é agravar outras patoloxías que xa existen, é dicir, actúa igual que a contaminación, que empeora outras enfermidades, principalmente respiratorias, circulatorias, neurolóxicas ou endocrinas". A consecuencia máis extrema dese agravamento é a morte.
"A primeira vaga de calor leva á mortalidade aquelas persoas que están máis graves", indica. "Cunha maior duración, o impacto vaise acumulando". A maioría das falecidas na Galiza estes días eran persoas de máis de 84 anos, con patoloxías previas.