En 2021 fanse dez anos do nacemento de ‘Twiter en galego’, unha iniciativa que ao longo deste tempo sumou máis de 30.000 seguidores e publicou miles de chíos sobre diferentes cuestións relacionadas coa realidade galega.
A compañía twitter vén de suspender a conta, “por agora temporalmente e agardo que non sexa permanentemente”, sinala a Nós Diario Carlos Vieito, administrador de ‘Twiter en galego’ (cun só t e non 2 para evitar que se lle considere a marca oficial).
O motivo da suspensión, explica, foi que a compañía entendeu que quen estaba detrás da conta que fai agora 10 anos era un menor de idade de 10 anos e as normas de Twitter fixan que a idade mínima para poder ter conta é 13 anos.
Teño unha mala nova 😩 Como sabedes, este ano o Twitter en galego cumpre nin máis nin menos que 10 aniños, mais Twitter entende que quen está detrás da conta é un menor.
— Carlos Vieito 💙 (@comumola) February 3, 2021
Por esta razón, nestes momentos a conta permanece suspendida até que se aclare o asunto 😑
“Agora estou reclamando para que ma devolvan e que sexa nas mesmas condicións: non perder historial de chíos, seguidores...”, sinala Carlos Vieito. “Que a conta volva activarse mantendo o traballo de todos estes anos”, desexa.
A de twitter non é a única batalla que está a levar a cabo Vieito. Explica que tamén está suspendida a conta ‘Instagram galego’, se ben nesta ocasión foi por unha denuncia anónima de ‘usurpación’. “unha denuncia anónima e agora estou con toda a documentación e traballo para recuperar Instagram”
