O Sindicato Labrego Galego afirma que as pretensións de Erimsa con estes litixios fronte ao Concello de Cospeito buscaban a “reactivación dun procedemento iniciado en 2008 e, polo tanto, caducado, para obter autorización para a súa actividade en territorio cospeitense”.
Porén, sinala o SLG, “esta empresa con capital chinés e domicilio en Noruega, non subsanara deficiencias como a falta de informes sectoriais favorábeis por parte de diversos departamentos da Xunta”.
Entre outros argumentos, continúa esta organización, as sentenzas din que é incuestionábel que o expediente de autorización autonómica previa rematou nunha resolución firme desestimatoria.
“Estas sentenzas contrarias súmanse ás ditadas no ano 2016, onde se lle denegaba a licenza municipal para as concesións Alicia e Karles, en Castro de Rei e Cospeito, previa denegación da autorización autonómica”.
Nestes anos, desde a Comision contra as Minas na Terra Chá, solicitaron reiteradamente á Xunta a declaración de caducidade das concesións mineiras. “Porén, a día de hoxe seguen en vigor dun xeito totalmente irregular”.