A resolución ratifica as restricións específicas adoptadas pola Xunta, e publicadas no DOG o pasado día 7, para frear o avance de casos de coronavirus nas comarcas de nas comarcas de Allariz-Maceda, O Carballiño, Ourense, O Ribeiro, Valdeorras e Verín.
Entre elas cóntase a decisión de confinar os concellos de Ourense e Barbadás, onde non se permite a mobilidade "co fin de controlar a irradiación de casos a outros concellos da comarca", limitando os traslados, agás por causas excepcionais e xustificadas.
A decisión, que chega na mesma semana na que o Tribunal Superior de Xustiza de Madrid tombaba as restricións o fechamento desta cidade, e outros nove municipios da comunidade, baixo o argumento de que a restrición por supor "unha inxerencia nos dereitos fundamentais sen habilitación legal que a ampare", contou, no caso da Galiza, con informe favorábel da Fiscalía.
Na súa resolución, a sala do contencioso administrativo do alto tribunal galego conclúe que as ordes sanitarias da Xunta, malia privar ou restrinxir dereitos e liberdades fundamentais, "teñen amparo nas leis nas que se fundamenta a solicitude", "están xustificadas" e mesmo "son son idóneas para a prevención e protección da saúde da poboación á que van destinadas (...) dada a constatación dunha situación de perigo actual e real para a saúde da cidadanía".
Da mesma maneira, o TSXG, noutro auto tamén emitido no día de onte, apoia as restricións sanitarias de Compostela e a súa comarca.