Unha sentenza ditada polo Tribunal Constitucional desestima os escritos apresentados pola familia do cámara José Couso e pola Asociación Libre de Avogados contra das resolucións emitidas pola Audiencia Nacional nas que se acordou arquivar a investigación do seu asasinato en base ao que marca a limitación da xurisdición universal após a reforma levada a cabo polo goberno do Partido Popular no ano 2014. Precisamente, os escritos apresentandos pola familia e a ALV alegaban a inconstitucionalidade da reforma lexislativa impulsada polo PP así como a vulneración da Convención de Xenebra.
A sentenza do Tribunal Constitucional sinala que as resolucións da Audiencia Nacional e posteriormente do Tribunal Supremo, ambas na mesma liña, non vulneron o dereito á tutela xudicial efectiva, nin o dereito a un proceso con todas as garantías nin o principio de igualdade.
Coa reforma da lei que realizou o PP esíxese que o procedemento "se dirixa contra un español ou contra un cidadán estranxeiro que resida habitualmente en España ou contra un estranxeiro que se atopase en España e cuxa extradición fose denegada polas autoridades españolas".
Coa reforma da lei que realizou o PP esíxese que o procedemento "se dirixa contra un español ou contra un cidadán estranxeiro que resida habitualmente en España"
Nese sentido, a sentenza do Tribunal Constitucional baséase para dar a razón á Audiencia Nacional e ao Supremo en que os militares iaquis non residen habitualmente no estado Español nin se atopan ocasionalmente en territorio español.
José Couso foi asasinado o 8 de abril de 2003 cando se atopaba no hotel Palestine de Bagdad, xunto outras e outros profesionais da prensa internacional que cubrían a invasión do Iraque.
Couso converteuse nun símbolo pola liberdade de prensa e contra a mordaza informativa. Precisamente o premio José Couso honra a memoria deste cámara ferrolán. O Colexio Profesional de Xornalistas de Galiza e o Club de Prensa de Ferrol crearon este premio para recoñecer a persoas ou organizacións que traballan pola liberdade e contra a manipulación informativa, así como para lembrar na figura de José Couso todas aquelas persoas profesionais do xornalismo que cada ano son asasinadas, maltratadas ou privadas dos seus dereitos como persoas e como informadoras.
