O Colexio Oficial de Traballo Social da Galiza (COTSG) pídelle á Xunta que envíe, "sen demora, protocolos para as e os traballadores dos servizos sociais nesta primeira fase do desconfinamento". Segundo recoñece a entidade nun comunicado, a experiencia das profesionais colexiadas confirma grandes eivas na fase de desconfinamento na dependencia.
Así, desde a Xunta de Goberno cren que a Administración debe abordar "canto antes" as condicións deste sistema, encargado de "velar polas persoas maiores".
Desde o COTSG sinalan a existencia de "moito atraso na asignación de prazas residenciais das emerxencias que contemplan as situacións de abandono, de risco inminente para a integridade física das usuarias ou de malos tratos". O resultado, din, é o "desamparo no que a Administración galega ten sumidas as persoas máis vulnerábeis sen contemplar protocolos axeitados e eficaces de emerxencia que garantan unha vida digna".
Así, as traballadoras sociais da Galiza urxen a creación de protocolos de desconfinamento para a reapertura de centros dirixidos a persoas en situación de dependencia, a reforzar os servizos de proximidade, a fixar as fases de reapertura dos centros, a procurar mecanismos de conciliación para as profesionais e o acceso a tests de coronavirus.
