Torradas, a sobremesa estrela da Semana Santa

En Media Laranxa somos moi fans deste doce e existen mil e unha formas de facelas, tanto a versión tradicional das nosas avoas, como recheas de chocolate ou salgadas. As torradas son unha delicia fagan como se fagan. Por ese motivo, non é difícil saírmos das nosas fronteiras e atopármonos con elas en diferentes lugares. Temos, por exemplo, o pain perdu (pan perdido) na Franza ou os Arme Ritter (cabaleiros pobres) na Alemaña. Do outro lado do Miño, podemos degustar as rabanadas ou fatias douradas e, curiosamente, non se trata dunha sobremesa típica da Coresma, senón do Nadal. Esta receita de aproveitamento ten unha orixe bastante de vello. Trátase dun dos doces máis antigos dos que hai constancia, pois aparece no libro De re coquinaria (s. IV-V), atribuído a Marco Gavio Apicio. Na nosa tradición, as torradas xa aparecen recollidas na literatura de transmisión oral no século XIX: Torradas e máis torradas, torradas así ó serio; parece que t'estou vendo á porta do cemiterio. Outro exemplo da longa tradición desta sobremesa na nosa terra é a distinción que Álvaro Cunqueiro marcaba entre as torradas de Castela, de pan migado, e as torradas galegas, feitas de rebandas resesas de pan trigo dos días anteriores. Sexa cal for o pan empregado, en Media Laranxa propoñémosche diferentes versións para todos os padais. A receita tradicional nunca falla. Para preparalas só temos que quentar o leite e aromatizalo coa casca de laranxa e a canela. Deixarmos que o pan absorba todo o leite, rebozarmos as rebandas en ovo e fritírmolas até que se douren. Esparexermos azucre e canela por riba e xa estarían listas para gozarmos desta exquisitez. Porén, para conseguirmos a torrada perfecta temos que ter en conta algúns aspectos. É importante que o pan sexa de dous ou tres días antes e que o seu grosor sexa de dous dedos. Desta forma, conseguiremos que o pan absorba a cantidade de leite correcta e que a textura quede perfecta. Outro dos segredos é escollermos ben o leite. É recomendábel utilizarmos leite enteiro para que infusione ben coa canela e cos cítricos, e cómpre eliminarmos a parte branca da monda para evitarmos ese amargor. No entanto, para aquelas persoas que lles guste innovar, propoñemos unhas torradas recheas de crema de cacahuete, de chocolate ou marmelada. Podemos utilizar o sabor que máis nos preste. Se quixerdes facer unha versión saudábel, en Media Laranxa ensinámosvos a facelas ao microondas, ao forno ou en tixola e animámosvos a probar novos sabores acompañándoas dunha bóla de xeado de framboesa ou de limón e engadindo unhas follas de menta. Sexa como for, lembra que a cociña está para comermos a lingua!