Pode ser mellor deixar que unha febre leve siga o seu curso en lugar de recorrer automaticamente á medicación, xa que pode axudar a eliminar a infección máis rapidamente, segundo un novo estudo realizado en peixes pola Universidade de Alberta (Canadá).
No seu traballo, publicado na revista científica eLife, os investigadores descubriron que a febre moderada non tratada axudaba os peixes a eliminar rapidamente a infección do seu organismo, controlaba a inflamación e reparaba o tecido danado.
"Deixamos que a natureza faga o que fai, e neste caso foi moi positivo", afirma o inmunólogo Daniel Barreda, autor principal do estudo e profesor da Facultade de Ciencias Agrícolas, Biolóxicas e Ambientais e da Facultade de Ciencias.
A febre moderada é autorresolutiva, o que significa que o corpo pode inducila e apagala de forma natural sen medicación, segundo explica Barreda.
As vantaxes da febre natural para a saúde humana aínda deben confirmarse mediante a investigación, pero os investigadores afirman que, dado que os mecanismos que impulsan e manteñen a febre son compartidos entre os animais, é razoábel esperar que se produzan beneficios similares nos humanos.
Iso suxire que deberiamos resistirnos a recorrer a medicamentos, como os antiinflamatorios non esteroideos, ante os primeiros síntomas de febre leve. "Quitan o malestar que sente coa febre, pero tamén é probábel que esteamos a renunciar a algúns dos beneficios desta resposta natural", apuntou.
O estudo axuda a lanzar luz sobre os mecanismos que contribúen aos beneficios da febre moderada, que Barreda sinala que se conservou evolutivamente en todo o reino animal durante 550 millóns de anos: "Todos os animais examinados teñen esta resposta biolóxica á infección".
Procedemento do estudo
Para o estudo, administrouse aos peixes unha infección bacteriana e despois seguiuse o seu comportamento e avaliouse mediante aprendizaxe automática. Os síntomas externos eran similares aos observados en humanos con febre, como inmobilidade, fatiga e malestar. Estes síntomas relacionáronse con importantes mecanismos inmunitarios dos animais.
A investigación demostrou que a febre natural ofrece unha resposta que non só activa as defensas contra a infección, senón que tamén axuda a controlala.
O equipo investigador descubriu que a febre axudaba a eliminar a infección dos peixes nuns sete días, a metade do tempo que tardaban os animais aos que non se permitía ter febre. A febre tamén axudou a acabar coa inflamación e reparar o tecido lesionado.
"O noso obxectivo é determinar a mellor maneira de aproveitar os nosos avances médicos sen deixar de aproveitar os beneficios dos mecanismos naturais de inmunidade", recalcou Barreda.
