Un terremoto de magnitude 3,8 na escala de Richter rexistrado de madrugada fronte á costa da ría de Muros e Noia, con epicentro no Atlántico, fíxose sentir en diferentes localidades do país como Rianxo, Brión, Vigo, A Estrada, Soutomaior ou os propios concellos de Muros e Noia.
Porén, este movemento sísmico non provocou ningunha incidencia salientábel e o teléfono de emerxencias da Galiza 112 non recibiu chamada ningunha nas últimas horas.
Segundo información ofrecida polo Instituto Xeográfico Nacional, o tremor da terra produciuse contra as 3.45 horas na zona do Atlántico-Galiza, fronte á costa de Muros e Noia, cunha profundidade de 19 quilómetros.
Fortes choivas na Galiza
Por outra parte, a AEMET alerta de abundantes precipitacións durante esta quinta feira en territorio galego, con acumulacións de até 40 litros de auga por metro cadrado en diferentes comarcas. Aliás, sinala o risco de fenómenos costeiros por todo o litoral.
A respecto dos ventos, a AEMET avisa de fortes refachos do suroeste ao litoral noroeste do país ao longo de toda unha xornada que marcarán os ceos nubrados e as persistentes precipitacións.