As borrascas Geràrd e Fien deixaron na Galiza máis de novecentas incidencias desde que fixo a súa entrada no país. Os casos máis repetidos rexistrados polo 112 Galiza tiveron que ver, unha vez máis, co vento e coa chuvia, que provocaron a presenza de árbores e pólas sobre as estradas, ás que se lle viñeron sumando progresivamente incidencias relacionadas con alagamentos, estradas ou vivendas, desprendementos e derrubamentos.
Risco de desbordamento
A Dirección Xeral de Emerxencias e Interior mantén activo o plan especial ante o risco de inundación na Galiza (Inungal), en situación de alerta para unha vintena de ríos galegos, que esta terza feira se atopaban por riba do seu nivel de desbordamento.
O Concello de Begonte (comarca da Terra Chá) sufriu con especial intensidade os efectos do temporal, con coches atrapados en estradas anegadas e cunha ducia de familias que non podían abandonar as súas vivendas. Algúns veciños e veciñas tiveron que ser rescatados por Protección Civil cunha embarcación pneumática.
Circulación complicada
Pola súa parte, a neve tamén provocou incidencias nas zonas montañosas da Galiza. A Dirección Xeral de Tráfico (DXT) constatou dificultades para circular en dúas vías galegas.
Na A-6, ao seu paso polas Nogais (comarca dos Ancares), con nivel de alerta verde, que implica precaución e control da velocidade. E tamén en varios quilómetros da LU-633, ao seu paso polo porto de Alto do Poio (Pedrafita do Cebreiro), con nivel de alerta amarela, polo que estivo prohibida a circulación de camións.
A alerta laranxa por fenómeno meteorolóxico adverso por nevaradas nas montañas de Lugo e Ourense, que a Axencia Estatal de Meteoroloxía (Aemet) activou nas primeiras horas desta terza feira, manterase vixente durante o día de hoxe. A alerta laranxa por forte ondada na costa da Galiza activada esta terza por ondas de máis de nove metros, tamén estará vixente hoxe.
Danos no subministro eléctrico
O temporal Fien provocou da mesma maneira danos no tendido eléctrico en distintos puntos do país. As compañías Naturgy e Begasa ratificaron a existencia de incidencias que deixaron vivendas de Boiro (O Barbanza), Carballo (Bergantiños), Outeiro de Rei (Lugo) e O Barco de Valdeorras sen subministro eléctrico de maneira puntual nuns casos, e durante horas noutros.