Por volta dun cento de persoas concentráronse esta segunda feira (12 de xaneiro) perante os xulgados da Coruña coincidindo co proceso xudicial aberto contra o responsábel comarcal do BNG, Paulo Carballada.
O militante nacionalista compareceu nas dependencias xudiciais para prestar declaración após ser denunciado pola policía española por un presunto delito de "atentado á autoridade" e "agresións" contra un axente de policía no marco dos protestos contra a visita de Angela Merkel desenvolvidos en Compostela no mes de agosto.
Arroupado pola militancia do Bloque e o portavoz nacional da organización frontista, Xavier Vence, Carballada tamén estivo acompañado por Rubén Cela e Afonso Losada, outros dous dos 5 militantes aos que lles foi notificada pola Subdelegación do Goberno español a denuncia.
Ás portas do xulgado, Carballada asegurou que "o atestado policial é absolutamente falso", o que considerou "moi grave".
Pola súa banda, o voceiro do BNG, Xabier Vence, enmarcou o proceso xudicial contra a militancia do BNG nunha estratexia de "criminalización das protestas" sociais contra as políticas do Partido Popular. Asemade, sinalou, considerou o xuízo "un ataque á liberdade de expresión".
