#Sermos355: O Pico Sacro e o imaxinario colectivo

Redacción

17/xul./19 - 21:15

Seguinte

Coa cuarta feira chega un novo número do semanario en papel Sermos Galiza, xa á venda na loxa e a partir da quinta feira nos quiosques.

Chega un novo semanario en papel Sermos Galiza, que suma xa 355 números e faino cun Tema de Primeira sobre os 40 anos da norma oficial que abriu a porta ao galego no ensino público e sobre o retroceso que supuxo o chamado Decreto do Plurilingüismo de 2010.

Continúa cunha nova entrega de A ollo nu, sección asinada por Xoán Costa, e polas columnas de opinión de Marilar Aleixandre e Guillerme Vázquez.

En sociedade, abrimos cunha reportaxe sobre unha nova edición do ascenso ao Pico Sagro coa que se reproducirá o percorrido que Castelao realizou até o cumio en 1924 e ao que simbolicamente volveu, anos despois, cando escribía Alba de Gloria.

En economía, entrevistamos Jesús Méndez, director xeral da Caixa Rural Galega, entidade cuxas contas de 2018 bateron récord de beneficios. As mulleres na loita contra os incendios e a produción agroalimentar tamén están nesta sección.

En política coñecemos cales son as prioridades de cada formación política na Deputación da Coruña e analizamos a situación da formación política En Marea.

En internacional, analizamos o escenario en Grecia após a derrota de Tsipras.

Abrimos o Fóra de Serie cunha reportaxe sobre o denominado “Plan General de Colonización de la Tierra Llana”, co que goberno o franquista instalou 189 familias de colonos en Matodoso, Arneiro, Veiga de Pumar e A Espiñeira co obxectivo de reordenar as terras e introducir a mecanización na agricultura, e continuamos cunha entrevista ao brasileiro José Jackson Coelho, reitor da Universidade Estadual do Ceará e renovador da psiquiatria no seu país.

Cilia Torna achéganos ao mapa da raíña Sancha e do rei Fernando elaborado en 1047 e que amosa o papel reitor que a Galiza ocupaba no espazo cristián peninsular.