Esta semana de xornadas web, que se poden seguir a través da da sala virtual de jit.si e que coinciden tamén coa celebración, mañá, do Día Internacional da Terra, son o anticipo da acción do día 24, convocada para as 22 horas baixo o cancelo #accionglobalpoloclima, coa que se propón que a sociedade "saia do inmobilismo actual para transformar a actividade económica de maneira climática e socialmente xusta".
O chamado estaba previsto para ser realizado nas rúas pero, ante a crise sanitaria e social do coronavirus e as restricións que derivan desa, realizarase desde as casas, a través da "manifestación de luces e sombras", cuxas imaxes e vídeos poderán compartirse a través das redes sociais.
Entidades como Verdegaia, unha das organizacións que fan parte no Movemento Galego polo Clima, apuntan unha serie de principios a reivindicar con esta acción, como son, desde o punto de vista climático, enfrontar unha redución drástica das emisións netas de gases de efecto invernadoiro, en liña coas indicacións científicas, e, desde o punto de vista social, a consideración das persoas e dos colectivos vulnerábeis como prioritarias, de cara a garantir unhas condicións de vida dignas.
A programación inclúe, mañá, ás 17 horas, a intervención do profesor da Universidade de Santiago de Compostela Pablo A. Meira, especialista en educación ambiental e social, e quen afondará na crise climática en tempos do coronavirus. Ademais, ás 20.15 horas, haberá unha segunda palestra sobre eficiencia enerxética e aforro no fogar da man de Pablo Guillán, membro da Xuventude polo Clima e Extintion Rebellion de Vigo.
Na quinta feira, día 23, ás 18 horas, integrantes en Extintion Rebellion Galiza propoñen unha sesión titulada 'De camiño á extinción e que facer ao respecto'-
A propia sexta feira, ás 18 horas o biólogo e membro de Ecoloxistas en Acción Xosé Veiras falará da COVID-19 e a emerxencia ecolóxica, como previa á acción climática da noite.
