Os datos facilitados este domingo pola Consallaría de Sanidade confirman a liña descendente dos casos activos por Covid-19 na Galiza. Despois de que este sábado o número de casos activos caese por baixo de 4.000 por primeira vez desde setembro, este domingo produciuse unha nova baixada até situarse en 3.676, o que supón 276 menos que os contabilizados a xornada anterior.
Os casos activos volven reducirse en todas as áreas sanitarias. Na da Coruña e Cee contan con 1.270 (-72), seguida por Vigo con 631 (-45), Pontevedra que suma 492 (-49) e Santiago-Barbanza que rexistra 405 (-46). Así mesmo, Lugo, A Mariña e Monforte contabilizan 327 contaxiados (-12), Ferrol conta con 321 (-38) e en Ourense, Verín e O Barco hai 230 (-14)-.
Persoas ingresadas
Os hospitais galegos contan con 382 persoas ingresadas con coronavirus (-10), das que 80 permanecen en coidados intensivos (-2). O número de hospitalizados diminúe nas áreas sanitarias de Santiago e Pontevedra, mentres na Ferrol mantense estable e crece nas da Coruña, Lugo e Ourense.
A área sanitaria da Coruña e Cee permanece como a que presenta máis contaxiados hospitalizados 135 (+2) aínda que se manteñen en 29 os que se atopan en UCI.
Tamén soben os ingresos nos hospitais da zona de Lugo, A Mariña e Monforte, que contan con 33 ingresados (+4), dos que nove se atopan en UCI (-1). Ademais, na área sanitaria de Ourense, Verín e O Barco hai 28 ingresados (+2), tres deles en UCI (+2).
A área sanitaria de Ferrol mantense sen cambios no número de ingresos, que suman 40, e a parte deles que permanecen en UCI, seis. Aínda que en Vigo caen a 59 os hospitalizados (-3), no apartado de críticos hai un máis até chegar a 15.
Pola súa banda, os hospitais da área de Santiago e Barbanza contabilizan 58 pacientes con COVID-19 (-4) dos que 11 (-2) se atopan en coidados intensivos. Da mesma maneira, redúcese a presión hospitalaria nos centros da área sanitaria de Pontevedra e O Salnés, que rexistran 29 pacientes con coronavirus (-6), dos que 7 están en críticos (-6).
Contaxios novos
Desde o inicio da pandemia confirmáronse 113.633 contaxios na Galiza. Na última xornada detectáronse 137 novos casos mediante distintos tipos de probas, 112 deles, a través de PCR. Así, por segundo día consecutivo, produciuse un descenso nos positivos diarios diagnosticados, que se reducen en 47.
Por áreas sanitarias, A Coruña suma 50 novos casos, Vigo, 22 máis; en Lugo hai 19 novos contaxiados, en Santiago detectáronse 15 e en Ourense rexístranse 13 diagnosticados máis. Séguenlle Ferrol, con 11 novos positivos, e Pontevedra, con sete.
Das 113.633 persoas contaxiadas na comunidade desde o inicio da pandemia, 27.253 corresponden á área da Coruña; 21.365, á de Vigo; 18.081, á de Santiago; 14.641, á de Ourense; 12.469, á de Pontevedra; 11.786, á de Lugo; e 8.038, á de Ferrol.
Taxa de positividade
A porcentaxe de infeccións por test PCR realizados, denominada taxa de positividade, rexistrou unha baixada notábel desde un 2,4% até un 1,3% e mantense por baixo de 5%, a que a Organización Mundial da Saúde (OMS) fixa como máximo para dar por controlada a pandemia.
Desde o inicio da chegada da Covid-19 faleceron na Galiza 2.268 diagnosticados de coronavirus, tras notificar as autoridades sanitarias este sábado catro novas vítimas.