A Xunta vén de informar de 15 decesos vinculados coa Covid-19 ao longo do día, polo que o número de vítimas xa chega a 1.024.
Malia que houbo dúas xornadas con 21 falecementos, esta é unha das maiores cifras rexistradas na segunda onda no país. Aliás, segundo a Consellaría de Sanidade, todas estas persoas padecían patoloxías previas que complicaban a súa saúde.
Das 15 persoas, cando menos sete eran residentes en xeriátricos. De feito, onte xurdiu unha nova polémica vinculada a estas infraestruturas, que parecen funcionar sen grandes graos de control segundo algúns sindicatos.
Así, finou unha muller de 92 anos en Ferrol que fora trasladada desde a residencia As Fragas (Pontedeume) e tampouco se puido facer nada por outra usuaria de 92 anos que permanecía no hospital de Lugo tras ser levada desde a Vivenda Comunitaria Remanso de Paz da Fonsagrada.
Na residencia San Cibrao de Cervo tamén tiveron a baixa dunha persoa de 84 anos que estaba sendo atendida no centro hospitalario da Mariña e no hospital de Ourense faleceu unha muller de 97 anos que vivía na Nosa Señora dos Miragres de Barbadás. De feito, na propia residencia, sen tempo a ir ao hospital morreron dúas mulleres de 88 e 98 anos de idade. Por último, no hospital do Salnés notificaron o falecemento dunha residente da DomusVi de Ribadumia de 91 anos.
O resto das 15 vítimas tiveron o pasamento no Complexo Hospitalario da Coruña (dous varóns de 88 e 71 anos e unha muller de 66) e no hospital de Ferrol rexistrouse outra vítima de 54 anos. Na súa casa de Fene non superou o virus un home de 84 anos.
No Hospital Lucus Augusti o equipo sanitario non puido facer nada para salvar a unha muller de 83 anos e algo parecido sucedía no centro hospitalario de Ourense cun home de 78 anos. En Compostela, tamén estando ingresado, contabilizouse o deceso dun doente de 72 anos.
