O ministro de Sanidade, Salvador Illa, instou a "non pensar en novas medidas" de restricións para o Nadal porque entende que as actuais "xa son moi drásticas", incluíndo a prohibición de desprazamentos entre territorios agás familiares e achegados.
"As medidas xa son moi drásticas, non sei se somos conscientes de que acordamos non movernos da nosa comunidade autónoma. Aínda que sempre hai a posibilidade de que, se as cousas non evolucionan da forma que esperamos, endureceranse as medidas, hoxe gustaríame poñer énfases en cumprir as medidas acordadas en lugar de pensar en novas medidas", sinalou o ministro durante a presentación da campaña de Nadal contra a pandemia.
Illa apelou de novo á responsabilidade: "Non podemos poñer un policía en cada casa". Ademais, reiterou que as actuais medidas xa están "axustadas á realidade e sobre todo co obxectivo de non dilapidar o que se conseguiu con tanto esforzo na segunda vaga".
"A pandemia obrigou a mudar moitos hábitos e vai provocar que este Nadal sexa distinto: haberá Nadal, claro que si, pero celebrarémola de forma distinta", reiterou.
O ministro recoñeceu que a evolución da pandemia está a ser "favorábel" nas últimas semanas pero aínda se está "moi lonxe do que se quere chegar" -lembrou a cifra de 25 casos por cada 100.000 habitantes-. "Por iso agora pedimos extremar as medidas de precaución e tamén ao valor da solidariedade: o que facemos afecta o resto de cidadáns", destacou.
En calquera caso, Illa insistiu en que as recomendacións sanitarias apuntan a que "canto máis se restrinxan os contactos moitísimo mellor" e explicou a excepción de familiares e achegados. "Todo o mundo sabe que un achegado é unha persoa con vinculación afectiva importante", indicou.
