Após días paralizada, a obra que ameaza a illa do Toleiro en Sarria volvéronse reanudar. Esta cuarta feira, a empresa constutora reactivou a actividade dun proxecto --apoiado polo Concello e a Conferencia Hidrográfica Miño-Sil-- que poñerá fin ao patrimonio etnográfico que acolle o illote. E é que o Toleiro conta cun bosque de ribeira con máis de 170 ameneiros, unha especie protexida que se dá por perdida en toda Europa.
Perante a reanudación das obras e o temor a que a ponte que une a illa do Toleiro coa vila de Sarria sexa derrubada, a veciñanza e a Plataforma Sarriana polo río botáronse á rúa para impedir que o proxecto avance.
"Polo de agora estamos na ponte para evitar que se tire", contan desde a Plataforma en conversa con Sermos Galiza. "Mais todo parece que o derrubo podería ser inminente", aseguran. Pois "xa quitaron a estatua e as farolas que había na ponte". O ambiente entre a veciñanza, explican, "é de impotencia" pois "non sabemos se será hoxe ou mañá". No entanto, a rápida resposta social freou temporalmente a destrución da ponte.
Así as cousas, desde a Plataforma Sarriana polo Río aseguran que continuarán adiante coa mobilización para impedir que as obras destrúan este patrimonio etnográfico tan valioso.