A operadora ferroviaria Renfe recuperará un dos seus servizos na Galiza dentro dunhas semanas. Trátase da conexión de tren que unía as cidades da Coruña, Vigo e Ourense con Euskadi.
A compañía viña recibindo moitas críticas no país pola supresión de frecuencias e servizos desde o confinamento e, malia que hai oferta por retomar, polo momento parece que os enlaces do Alvia permitirán unha maior mobilidade entre a Galiza e o País Vasco.
En concreto, esa liña será habilitada a partir de enlaces co Alvia que viaxa entre Galiza e Barcelona. En consecuencia, haberá paradas na Coruña, Vigo e Ourense que logo darán unha dupla posibilidade: seguir cara Catalunya ou baixar do primeiro tren en Miranda do Ebro e Vitoria, facendo transbordos até Bilbao e Irún.
En paralelo se fornecerá un servizo a localidades intermedias como Burgos, León ou Palencia.
A novidade non será real até o 11 de xaneiro pero os billetes comezaron a venderse hoxe mesmo, segundo explica Renfe nun comunicado.
Case un ano despois
Segundo fontes da operadora, coa nova tempada o traxecto entre Galiza e Euskadi decorrerá por un tempo menor. Entre 30 e 48 minutos menos dos que tardaba o Intercity, que quedou suprimido en marzo pola corentena e que regresa á programación case un ano despois.
Agora haberá que agardar novidades dentro do país, mais de momento as críticas e queixas das usuarias e usuarios non xurdiron efecto. Renfe limítase a destacar que, no caso desta reposición de ferrocarrís, ofrece pases combinados para “incrementar o conxunto de solucións de viaxe dispoñíbeis”.