Ribeira acollerá a iniciativa “Rede Lila”, do colectivo Mulleres en Acción, que se pon en marcha con motivo das festas da Dorna que están a ter lugar estes días. Nada para contribuír a unhas festas libres de violencia machista, a “Rede Lila” funciona a través de voluntarias en distintas localizacións.
O dispositivo morado, ora brazalete, ora diadema, coa inscrición “Punto Lila”, serve para identificar as voluntarias, ás que pode recorrer calquera muller que sufra unha agresión machista ou quen a presencie.
“Ademais da posíbel función disuasoria da presenza das voluntarias na rúa, pensamos que esta acción contribúe a crear consciencia sobre a importancia da sororidade para desfrutar das festas en pé de igualdade, sen medo e coa seguridade de que vai haber alguén a quen acudir no caso de sentíreste atacada”, explica Mulleres en Acción nun comunicado de imprensa.
O colectivo, que puxo en andamento a “Rede Lila” na noite do sábado, agradece a “formidábel resposta da mocidade ribeirense, pois foron numerosas as mozas que se ofreceron para colaborar nesta iniciativa”.
