O Estado español prorrogou os controis na fronteira interior terrestre con Portugal até o próximo día 6 de abril coas mesmas limitacións aplicadas até agora e despois de manter diferentes consultas de coordinación coas autoridades portuguesas.
Así o establece a orde publicada esta segunda feira no Boletín Oficial do Estado (BOE), e que amplía os controis que finalizaban este 16 de marzo. Desta forma, as entradas e saídas do territorio do Estado español a través da fronteira con Portugal só poderá realizarse polos pasos autorizados e durante os horarios que se establezan.
O vicedirector do AECT Rio Miño Uxío Benítez incidía a principios deste mes de marzona necesidade de abrir todos os pasos da fronteira e tamén de que se inxecten axudas económicas que palien o dano feito na economía da zona pola decisión dos estados español e portugués. “O mal xa está feito ábranse agora os pasos ou dentro dun mes. Non nos fixeron caso nas nosas reivindicacións e agora queremos que nos teña en conta e se nos compense polas perdas”, afirmou o nacionalista.
Benítez puxo cifras e lembrou que as persoas traballadoras están a gastar unha media de 200 e 300 euros mensuais en combustíbel nos rodeos para pasar polo único paso aberto 24 horas (Tui-Valença).
