Esta cuarta feira (28 de maio) os hospitais de Galiza voltarán ser o escenario de mobilizacións en defensa da sanidade pública. Convocadas polas centrais sindicais contra o desmantelamento de camas hospitalarias (até 1.200) durante os meses de verán, evidencian o rexeitamento do persoal sanitario a unha política marcada pola privatización e o desmantelamento do servizo sanitario público en Galiza.
Ao fechamento das camas súmanselle xa os procesos de privatización dalgúns dos servizos hospitalarios como o informático ou a publicación no Diario da Unión Europea (DUE) do concurso público que entregará á privada a xestión do servizo de esterilización do material sanitario, tamén cirúrxico, e que --advirten @s facultativ@s-- podería pór en risco a saúde das persoas por mor de criterios de esterilidade que ficarán en mans das empresas concesionarias e non baixo supervisión d@s profesionais, como acontece até o de agora.
A privatización empeora a calidade do servizo
O suposto aforro que pregoa o Partido Popular desde o Goberno galego fica ben lonxe de mellorar a calidade do servizo após a privatización como denunciou a Xunta de Persoal do Hospital da Coruña en relación ao servizo de compras de material. Logo de se entregar este departamento a unha empresa privada, os laboratorios do Complexo hospitalario da cidade herculina adoecían dun "grave desabastecemento" que impedía os laboratorios desenvolver as analíticas precisas para unha diagnose acaída d@s doentes.
"No laboratorio de Hormonas, faltaron os reactivos durante 3 ou 4 días", explicaban hai dous meses @s traballador@s do CHUAC. Naquela altura @s profesionais xa amosaron o seu rexeitamento perante a conselleira de Sanidade que visitaba as instalacións do complexo para 'supervisar' o decorrer das obras das novas Urxencias. Un espazo que, doutra volta, está a ser epicentro de mobilizacións e protestos por mor das "deficiencias estruturais, de recursos materiais e persoal" que denuncian desde a Comisión de Centro Especializada.
Núñez Feijóo inaugura as novas Urxencias do CHUAC e o persoal denuncia as "deficiencias estruturais" do servizo
E é que a premura coa que o goberno de Alberto Núñez Feijóo quixo inaugurar o novo servizo --a unha semana das eleccións europeas-- deixa sete días despois as novas Urxencias sen "a calidade e capacidade asistencial" que debera. "Caos organizativo, improvisación, má distribución do equipamento do material e da medicación, instalación de padiolas en áreas que carecen das condicións precisas, xunto á falta de profesionais de enfermería, auxiliares, celadores/as e limpadores/as en todos os departamentos". Estas son algunhas das deficiencias relatadas pola Comisión de Centro de Especializada do CHUAC, que tamén se manifestarán esta cuarta feira.
Os recortes orzamentarios están a atinxir a calidade do servizo segundo denuncian @s traballador@s do Sergas. Un exemplo claro, din, é desartellar camas hospitalarias durante o verán para non substituír o persoal de vacacións. "Se o seu obxectivo fose mellorar a saúde da poboación e non reducir gastos a forma de resolver a falta de persoal por vacacións sería contradanto substitutos pero a decisión da Xerencia non é esa senón pechar camas e reducir servizos sanitarios", denuncian desde a Plataforma SOS Sanidade Pública que apoia esta nova xornada de protesto nos hospitais galegos.