Segundo confirmaron a Europa Press fontes do ámbito penitenciario, o afectado desfrutaba dun terceiro grao, en réxime de semiliberdade, no Centro de Inserción Social da Coruña. Con todo, debido a unha falta, foille revogado este terceiro grao e ordenouse o seu reingreso na prisión de Teixeiro.
Á hora de ser trasladado á prisión, o centro de inserción alertou de que o home podería ter entrado en contacto cun caso positivo, polo que foi directamente illado no módulo de ingresos, onde se lle realizou unha proba PCR, que confirmou a sospeita.
O recluso atópase asintomático, polo que, previsibelmente, permanecerá en illamento no cárcere curtense até que supere a infección. Dado que non chegou a estar en contacto con outros internos, non se produciron na prisión contactos de risco, indican as mesmas fontes.
O de Teixeiro é o primeiro caso certificado de coronavirus nos cárceres galegos, que si tiveron contaxios entre o persoal funcionario na primeira etapa da pandemia e sospeitas, despois desbotadas, na comunidade reclusa.
Fontes sindicais chegaron a confirmar, nas primeiras semanas de expansión do coronavirus, até sete positivos, detectados en todos os casos antes da declaración do estado de alarma e apartados dos seus postos até a súa recuperación.
Nesas semanas, outros dous internos en Teixeiro chegaron a ser illados de forma preventiva, tras viaxar un deles desde Italia e compartir traslado ao centro penitenciario. As probas posteriores desbotaron a patoloxía.
