O Colectivo de presos intependentistas galegos --CPIG-- vén de facer público un comunicado en que chama "a toda a cidadanía galega a participar activamente nesta xornada de loita e reivindicación dos nosos dereitos nacionais", en referencia ao 25 de Xullo, Día da Patria.
Desde os cárceres onde cumpren prisión preventiva submetidos á dispersión, Antom Santos, Roberto R. Fialhega 'Teto', Xurxo R. Olveira, Eduardo Vigo, Carlos Calvo e Hadriam Mosqueira 'Senlheiro' revólvense contra "a acelerada fascistización" do Estado español e confían en que o Día nacional sirva para converter a capital do País "nunha expresión de dignidade e resistencia colectiva ante as agresións do poder español".
"Saúdo" ao soberanismo de esquerdas
Após enviar "un saúdo" a todas as organizacións que nesta quinta feira reclamarán a soberanía nacional e o poder popular "como necesaria saída á opresión estrutural que a Galiza sofre", o Colectivo de presos chama a secundar a mobilización convocada por Causa Galiza "facendo sentir con forza o independentismo revolucionario nas rúas de Compostela".
Ao igual que a manifestación do Bloque, tamén CG convocou a súa para as 12h na Alameda, polo que andarán as rúas da capital galega á mesma hora que a formación frontista. Porén, os seus camiños sepáranse para o acto final, que Causa Galiza realizará na Praza do Toural namentres o BNG continuará, coma cada ano, até a Quintana.