O PP tomba a iniciativa lexislativa popular en defensa da Atención Primaria

Abondaron os votos das parlamentarias e parlamentarias do Partido Popular na Cámara galega para rexeitar a Iniciativa Lexislativa Popular (ILP) máis apoiada da historia da Galiza. A proposta, promovida pola plataforma social SOS Sanidade Pública e avalada polas sinaturas de máis de 55.000 persoas, só contou co apoio das deputadas e deputados da oposición, que coincidiron cos impulsores na necesidade de dotar de máis medios a Atención Primaria para evitar o seu progresivo deterioro e de mellorar a súa calidade asistencial. A defensa da ILP de SOS Sanidade Pública correu a cargo de Vanesa Viquendi, voceira do colectivo Pediatras e Matronas Xa. Se acaso por iso, comezou a súa intervención denunciando a falla de pediatras na Atención Primaria: "Máis da metade dos concellos galegos non teñen pediatras". Ao tempo, lembrou que o Servizo Galego de Saúde “recorre a médicos de familia con ou sen curso de puericultura para atender menores de 14 anos, cos riscos que isto implica para a saúde das crianzas”. Nesta liña, advertiu de que están a subministrar “vacinas pautadas con até dous meses de atraso” e a “medicar de forma incorrecta menores de dous anos”. Na tribuna, Viquendi criticou os déficits de persoal no primeiro nivel de asistencia sanitaria. A este respecto, asegurou que “non temos médico de cabeceira en moitos centros de saúde e as súas baixas non se cobren durante moito tempo”. Nesta dirección, insistiu en que “en 90% dos casos de xubilación dos facultativos amortízanse as prazas”, dándose o caso dun “progresivo envellecemento dos profesionais”, que ten provocado que 43% dos médicos de Atención Primaria superen os 60 anos e 15,9% os 64. Ao tempo, criticou que “o persoal sanitario atende diariamente unhas ratios de pacientes moi superiores ás que determina a normativa e recomenda a Organización Mundial da Saúde (OMS), co conseguinte impacto na calidade asistencial”. Atención presencial A voceira de Pediatras e Matronas Xa demandou máis medios para os centros de saúde e a súa apertura á cidadanía. Precisamente, o texto da ILP presentado por SOS Sanidade Pública recollía no seu artigo primeiro que “as consultas levaranse a cabo, como regra xeral, de forma presencial. Así, só se o paciente opta voluntariamente por ser atendido de forma telemática poderá levarse a cabo a consulta polos devanditos medios”. Neste sentido, os promotores da iniciativa denunciaron que “o fechamento dos PAC obriga a poboación a recorrer ás urxencias hospitalarias que se colapsan periodicamente con longas esperas e pacientes nos corredores”. As listas de garda e os tempos de espera para unha cita en Atención Primaria foron outro dos aspectos apuntados por Viquendi: “Centros de saúde como o de Fontiñas, en Compostela, teñen unha demora na atención de entre seis e nove días, Vite (Compostela) de seis días, O Milladoiro, en Ames, de seis días e Rianxo ou Cacheiras, en Teo, entre 10 e 15 días”. Tamén advertiu desta realidade en Atención Especializada, onde se “agravan as doenzas” e viran en “interminábeis”, con “tempos de espera de 83,9 días para unha intervención cirúrxica, 25 para unha radiografía simple, 88 para unha resonancia e 118 para unha ecografía abdominal”. Viquendi responsabilizou da situación actual a falla de compromiso orzamentario da Xunta, cuxo conselleiro de Sanidade escoitaba o debate: “Galiza atópase á cola do Estado en investimento en Atención Primaria, só por diante de Madrid”. Neste contexto, reclamou “incrementar o orzamento até 25% do gasto sanitario total, como aconsella a OMS, pois co que se destina actualmente, menos de 12%, é inviábel”. Reaccións dos grupos Tras rematar a súa intervención, tomou a palabra o portavoz socialista en materia de Sanidade, Julio Torrado, quen apoiou a iniciativa sinalando que “o modelo asistencial de Atención Primaria non vale por estar baseado nun modelo médica-enfermeira xa superado”. A este respecto, reclamou dotar os centros de saúde de “máis persoal e non só de facultativos” e lembrou que “Galiza non cobre 20% das prazas de Médicos Internos Residentes (MIR), presenta a segunda peor ratio de enfermeiras do Estado e está á cola no número de matronas”. A continuación, a voceira nacionalista, Ana Pontón, cualificou a Atención Primaria como "o corazón do noso sistema sanitario, porque os médicos dos centros de saúde son os que coidan todos os días da nosa saúde". Pontón dirixiuse aos representantes do PP para afirmar que “mentres a sanidade pública salva vidas, os seus recortes matan” e para salientar que “non é decente pór a tarxeta de crédito por enriba da tarxeta sanitaria". "Non é decente un Goberno que deixa miles de galegos sen máis axuda que unha caixa de Lorazepam", lamentou. O representante popular, Alberto Pazos Couñago, rexeitou a iniciativa lexislativa popular cargando contra a entidade promotora, SOS Sanidade Pública. "A ILP non está redactada para salvar a sanidade pública, senón para salvar o relato das forzas da esquerda", acusou o popular, quen dixo que o colectivo é unha “sucursal política do bipartito, que non busca ningún acordo co Goberno senón cambialo". "A ILP está absolutamente trufada de partidismo, por iso obvia a falla de médicos", concluíu o deputado do PP. 39 prazas de Medicina Familiar fican desertas na oferta MIR do ano 2023 Un total de 39 prazas de Medicina de Familia ficaron sen cubrir na oferta de Médicas Internas Residentes (MIR) para 2023. As cifras deste ano inciden nunha realidade xa testada no pasado exercicio, cando quedaron sen cobertura 200 prazas na Galiza, cuestión que obrigou a unha segunda quenda de elección, na que non chegaron a cubrirse 93. Neste sentido, a CIG-Saúde afirmou onte que “do mesmo modo que ocorreu o ano pasado, a especialidade non resultou o suficientemente atractiva para os futuros facultativos. As 39 prazas desertas na Galiza representan case 20% do total do Estado. A este respecto, 20 delas concéntranse na área sanitaria de Lugo, que suma máis de 50% do conxunto do país, 14 na área sanitaria de Ourense e cinco na área sanitaria de Ferrol. Só a comunidade de Castela e León, con 55 prazas sen cubrir, presenta uns resultados peores que Galiza. A CIG-Saúde reclama “medidas urxentes para mellorar as condicións de traballo das profesionais da Atención Primaria, porque só así faremos atractiva a especialidade de Medicina Familiar e Comunitaria e conseguiremos rachar coa actual dinámica”. Tamén reclama "definir os cadros de persoal reais nos centros de saúde", dignificar a docencia e apostar por unha Atención Primaria que artelle o territorio”. Por outra parte, o sindicato médico CESM atribuíu onte as prazas desertas ás "pésimas condicións laborais" e apostou por "incentivar as prazas de difícil cobertura" e por "axilizar" a revisión do Plan de Atención Primaria para que "deixe de ser o 'parrulo feo' da sanidade.