A Plataforma polo Dereito ao Aborto lamenta que a Xunta de Galiza non presionara á compañía aseguradora Zurich para disuadila de presentar un recurso contra a sentenza ditada polo Xulgado do Contencioso Administrativo número 2 de Lugo que lle impón ao Sergas unha indemnización de 273.139,82 euros polos graves danos a unha paciente que derivou a Madrid a abortar após reiterados atrasos no diagnóstico do seu feto inviábel.
Marga Corral, activista da plataforma, explica, en declaracións a Sermos Galiza, que “quen ten a responsabilidade de iniciar accións non di nada e só fai declaracións como as que pode facer calquera veciño ou veciña. Vimos a Feijóo amosando a súa solidariedade polo caso de Paula (nome ficticio da muller afectada) pero despois segue sen modificar o protocolo e sen garantir que as mulleres galegas poidan abortar na sanidade pública galega”.
A activista sinala que o recurso da aseguradora, que “só atende os termos económicos”, representa “unha nova pedra no camiño dunha muller á que se lle puxeron impedimentos e decenas de trámites burocráticos”. “Agora que ten unha sentenza que recoñece as neglixencias do Sergas, atópase con que a aseguradora ratea parte dunha indemnización imposta por un xuíz polos danos que tivo que sufrir”.
“Quen ten a competencia para poder parar isto non ten a máis mínima intención de facelo”
A Plataforma polo Dereito ao Aborto, que vén de integrarse na Coruña no seo da Marcha Mundial das Mulleres, critica que “quen ten a competencia para poder parar isto [a derivación das interrupcións voluntarias dos embarazos a Madrid e os abortos sen asistencia médica en hospitais públicos galegos] non ten a máis mínima intención de facelo”. “Parécenos moi impactante que a pesar do que supuxo a sentenza de Paula, sigamos co mesmo protocolo. É indignante ver que cunha sentenza tan dura, o Sergas manteña as mesmas liñas de actuación”, engade Marga Corral”.
As activistas preparan novas accións para que as autoridades “respecten os nosos dereitos” e para “esixírmoslles responsabilidades” polos danos cometidos. Aliás, a Plataforma polo Dereito ao Aborto da Coruña e a coordinadora da Marcha Mundial das Mulleres da Coruña reuníronse a pasada sexta feira, 11 de novembro, para faceren seguimento da causa aberta pola Fiscalía da Audiencia Provincial da Coruña a respeito dos abortos sen asistencia sanitaria. O obxectivo da plataforma pasa por que a Fiscalía abra unha causa penal.
