Esta cuarta feira (30 de marzo) representantes da Plataforma galega en defensa do ensino público remitiron un escrito ás forzas políticas con representación no Congreso español para as instar a paralizar e derrogar a LOMCE por ser “extremadamente lesiva para o ensino público”, dixo o voceiro da Plataforma, Anxo Louzao.
A Plataforma asegura non comprender como aínda non foi paralizada a lei existindo unha maioría de forzas que se opoñen a ela no Congreso
Neste senso, sinalan que o escrito foi dirixido transcorridos dous meses desde a constitución do Congreso e perante a existencia dmaioría de representantes de distintas forzas políticas que manifestaron, durante a campaña electoral, que unha das primeiras medidas que ían adoptar sería paralizar e derrogar a LOMCE, explicaron.
“Para nós non hai xustificación para que a LOMCE a esta altura non estea como mínimo paralizada, previa a súa derrogación”, defendeu Anxo Louzao.
Chaman as familias a boicotear a reválida en secto de Primaria
Desde a Plataforma sinalan o "desatino" e "absoluto despropósito" que supón a súa implantación nos centros de ensino. Destarte e con motivo da aplicación das reválidas, instan as familias do estudantado a non levalas ese día a aulas. O pasado ano esta proba foi desenvolvida no terceiro curso de Primaria e, este ano, aplicarase en sexto como "prólogo", din, das que cribarán o alumnado na ESO e Bacharelato.
Así, Louzao lembrou que o boicote ás reválidas o pasado ano “tivo unha resposta moi satisfactoria, na medida en que máis do 50% do alumnado de terceiro de Primaria non realizou estas probas en Galiza”.