A representación das e dos traballadores do servizo contraincendios da Xunta na central CIG-Administración acusou a Xunta de ter a organización do dispositivo de control dos lumes “en cueiros” cando comeza a tempada de maior risco nos montes galegos.
Ademais de denunciar novamente a falta de vacinación ao colectivo e de indicar que falta unha maior formación por parte do Goberno galego e, en concreto, da Consellaría do Medio Rural, o sindicato incidiu en que “a improvisación” está a ser o que marca a posta en marcha do operativo especial.
Sinala que tanto a estrutura organizativa como os medios do servizo, así como a situación do persoal, están abertas.
“O operativo non está preparado para o alto risco nin tampouco para asumir unha semana de altas temperaturas”, remarca, aludindo ao problema engadido de que o Executivo permita un “modelo produtivo no que non se potencian as especies pirófitas, o que fai máis grandes e perigosos os incendios forestais”.
Así mesmo, advirten de que xa na primavera houbo problemas nalgúns lumes, pois por exemplo en Salvaterra -onde arderon 352 hectáreas- os equipos de extinción atoparon a “caseta do servizo fechada e só había unha motobomba de noite en todo o distrito”.
Pero a CIG non só fala dos problemas de material, senón tamén das supostas malas condicións do cadro de persoal.
O Servizo de Prevención de Incendios Forestais ten 2.350 empregadas e empregados, dos que, comentan, “un 40% ten un contrato precario, de apenas seis meses, e traballa sen coñecemento previo da data fixa de comezo e remate dos períodos de actividade”.