![Estación de tren de Santiago [Imaxe: Alberte Mera]](/asset/thumbnail,1280,720,center,center/media/nosdiario/images/2019/07/15/2019071520013427943.jpg)
Ourense contará cun novo tren Alvia a Madrid á primeira hora da mañá cando entre en servizo o novo tramo da liña de alta velocidade entre Zamora e Pedralba, segundo informou o presidente de Renfe, Isaías Táboas, nunha reunión cunha delegación de cargos do PSOE que tivo lugar no día de onte.
O encontro congregou Táboas co deputado socialista Adolfo Pérez Abellas, coa deputada Uxía Tizón e co senador Miguel Bautista, xunto ao secretario provincial, Rafael Villarino.
A través dun comunicado, o PSOE informa deste novo tren e celebra a "mellora" da conexión. Ademais, indican que o responsábel de Renfe comunicou que as estacións de tren de Ribadavia, O Barco, A Rúa e O Carballiño contarán "temporalmente" con asistencia persoal "para facilitar as persoas viaxeiras a compra nas máquinas de autovenda".
As novidades chegan despois das reiteradas queixas polas deficiencias do servizo, agravadas polas reducións aplicadas a raíz do estado de alarma, coa diminución de servizos en toda Galiza, que Renfe cifra en 35% para a media distancia.
No caso de Ourense, o pleno municipal que tivo lugar o pasado día 2 aprobou dúas mocións do BNG e o PP para pedir a recuperación das liñas recortadas e servizos como os de venda de billetes no Barco e na Rúa.
En concreto, o BNG aludiu aos prexuízos que supón a eliminación do tren Avant das 06.45 horas, que conectaba Ourense con Compostela e A Coruña, empregado por estudantes e como ruta laboral, unha petición que tamén expresou esta semana o sindicato CXT.
"Renfe informou de que o servizo Avant entre Ourense, Santiago e A Coruña conta na actualidade cunha das maiores taxas de reposición de servizos de todo o estado, alcanzando 86% da oferta que existía con anterioridade ao estado de alarma", expón, ao respecto, o PSOE.
