As oposicións do ensino terán lugar na terceira fin de semana de xuño, os días 18 e 19, en 14 localidades da Galiza.
Segundo vén de confirmar a Xunta, o proceso contará cun total de 222 tribunais encargados de avaliar o corpo de mestres e mestras, que se examinarán o sábado 18, e os corpos de inspectores, profesores de secundaria, de escolas oficiais de idiomas e de artes plásticas e deseño, citados o domingo 19.
Sedes das probas
Un total de 14 localidades acollerán as probas: A Coruña, Culleredo, Ferrol, Narón Santiago de Compostela, Lugo, Monforte de Lemos, Ourense, O Carballiño, Pontevedra, Marín, Lalín, Vigo e Vilagarcía de Arousa.
Os espazos concretos nos que se realizarán os exames publicaranse nos próximos días no portal da Consellaría de Educación.
A convocatoria contempla 2.484 prazas ás que se concorrerán arredor de 22.919 persoas.
No referido á promoción interna, o número de inscritas e inscritos nas oposicións é de 215 persoas, mentres que as restantes 22.704 persoas apuntáronse nalgunha das especialidades de novo ingreso.
Lembra o Goberno galego que, ao amparo do acordado coas organizacións sindicais, os interinos e substitutos non estarán obrigados a presentarse ao procedemento.