O BNG formulará no congreso d@s Deputad@s e no Parlamento de Galiza unha batería de propostas para "poñer fin ao drama social dos desafiuzamentos", un problema, sinalan na fronte nacionalista, produto da voracidade da banca e a tolerancia dos gobernos socialista e popular. O voceiro do BNG, Guillerme Vázquez, a deputada no Congreso, Olaia Fernández, e o parlamentar na Cámara autonómica, Cosme Pombo, compareceron para detallar a ofensiva de propostas e medidas que achega esta organización para crear alternativas aos desafiuzamentos.
Fernández Davila lembrou que desde o 2010 o BNG presentou varias iniciativas no Congreso a este respecto, "que nin PP nin PSOE apoiaron" e cualificou de "tomadura de pelo" e "lavado de cara" o Real Decreto que vén de impulsar o goberno, "pois non dá resposta ao drama social nin achega solucións". Davila, que quixo facer un recoñecemento social ao movemento social que se xerou en torno á oposición aos desafiuzamentos, reiterou as propostas do BNG sobre esta cuestión. Nesta liña, Davila lembrou que os nacionalistas presentaron iniciativas para que se recolla a dazón en pago, a moratoria ou a posibilidade de converter a hipoteca en alugueiro.
Comparecencia de Rajoy
Para alén disto, o BNG vén de rexistrar no Congreso unha solicitude de comparecencia de Mariano Rajoy para que explique que pasos e medidas dá o goberno español a respecto dos desafiuzamentos.
Pola súa banda, o parlamentar Cosme Pombo deu conta das medidas e propostas do BNG na Cámara autonómica para facer fronte a un escenario de execucións hipotecarias "que afecta a milleiros de familias".
Parque de vivendas
Nesta liña, Pombo avogou porque as vivendas que a banca vai meter no banco malo poidan ser habitadas por familias ou persoas con necesidades económicas. "Non pode ser que haxa milleiros de casas sen xente e milleiros de persoas sen casa", apuntou.
"Consecuencias obscenas"
O voceiro nacional do BNG, Guillerme Vázquez, enmarcou os desafiuzamentos como a "consecuencia macabra" do comportamento da banca e a tolerancia dos sucesivos gobernos. "A banca gaña si ou si e as persoas perden si ou si". Para o voceiro, o Real Decreto do goberno é unha "burla" á cidadanía e apelou a "esa Constitución española da que tanto falan, e que recolle o dereito á vivenda" para explicar que as achegas do BNG sobre desafiuzamentos "responden á necesidade e urxencia de acabar con este drama".
