Ómicron, a nova variante do coronavirus causante da Covid-19, está presente xa en 110 países diferentes, e continúa propagándose de modo exponencial, segundo informou a Organización Mundial da Saúde (OMS).
Tal e como destacou na actualización do seu informe técnico sobre a evolución da variante, ómicron duplica os casos nas comunidades onde se transmite en cuestión de dous ou tres días.
Diminución dos casos en Sudáfrica
Non obstante, non son todo malas novas, pois a OMS tamén explicou que as taxas de contaxio xa están en caída nas zonas de Sudáfrica onde se detectou por vez primeira.
Ademais, e segundo datos obtidos na propia Sudáfrica, así como no Reino Unido e Dinamarca, ómicron parece implicar un menor risco de hospitalización en comparación a anteriores variantes como delta, máis a OMS fai un chamamento á "prudencia".
Baixa a protección das vacinas
Finalmente, a Organización Mundial da Saúde indicou que distintos estudos preliminares afirman que a protección de vacinas como AstraZeneca ou Pfizer-BioNtech baixa ante ómicron.
