"Vostedes non respectan a pluralidade e minimizan a realidade da Galiza segundo lle conveña ao Partido Popular". Así resumiu a deputada do BNG Montse Prado a liña editorial da CRTVG durante a Comisión de control do ente público, na cal o director xeral, Alfonso Sánchez Izquierdo, convidou @s traballador@s a non faceren públicas as súas queixas.
Porén, a denuncia pública da "manipulación" e das "presións" que o cadro de persoal da televisión e da radio nacionais galegas sofren non é de hoxe. En abril de 2012, o peche con chave do control de realización do Plató 300 por parte d@s afectad@s polas preferentes fixo rebordar o vaso d@s traballador@s cando Sánchez Izquierdo abriu unha investigación acusando a "persoal propio" de ter colaborado na ocupación. O Comité de empresa valorou a posibilidade de denuncialo polas inxurias vertidas.
O seguinte pico no control que o PP exerce sobre os contidos que se emiten nas canles públicas de radio e televisión chegou após a imputación de varios cargos vinculados á formación conservadora en operacións policiais contra a corrupción. O tratamento informativo que está a recibir a operación Pokemon e o asunto do ex tesoureiro Luís Bárcenas levou @s traballador@s a se pronunciaren máis unha vez contra estas prácticas, que cualificaron de "especialmente vergoñentas e penosas".
"Ocultación" e "secundarización" das informacións que non lle conveñen ao PP
Porén, o BNG aproveitou a Comisión para colocar riba da mesa a "ocultación" de determinados contidos, como a multitudinaria manifestación nacional que as plataformas de afectad@s polas preferentes realizaron en Compostela o 2 de febreiro. O peche no plató protagonizado pol@s estafad@s en abril de 2012 estaba motivado precisamente porque os servizos informativos da televisión e da radio públicas estaban a botar terra sobre as súas mobilizacións.
Na liña, Montse Prado criticou que a TVG "responda aos intereses" do partido do Goberno e "secundarice" novas que afectan "a miles de galegos", como o acontecido coa sinalada protesta do 2 de febreiro. Após lembrar que a televisión e a radio públicas "están pagadas por todos", a deputada nacionalista xulgou que a cobertura que se lle deu "careceu do tratamento, lugar e tempo que merecía unha convocatoria que congregou miles de persoas".
Na mesma Comisión o BNG transladou a Sánchez Izquierdo unha pregunta ao redor do comunicado de imprensa enviado polo Comité de empresa en que representantes d@s traballador@s denunciaban as "presións" para non dar conta dos casos de corrupción. Moi lonxe de recoñecer tales prácticas e aclarar a súa motivación, o director xeral da CRTVG convidou o cadro de persoal a non facer públicas as súas queixas, silencio que a parlamentar Prado achacou a que o que foi director de La Región "asome esas presións e esa manipulación".