Con varias semanas para dar conta da efectividade das vacinas contra a Covid-19 que xa están no mercado e cando se camiña cara outros remedios dunha soa inoculación, desde BioNTech -responsábel parcial do fármaco de Pfizer que se está aplicando á xente máis maior- alertan de que será preciso contar cunha terceira dose da vacina.
A nova chega da man do co fundador da compañía, Ugur Sahin, que hoxe mesmo alertou de que as e os cidadáns que sexan tratados con este medicamento terán que someterse a unha terceira quenda de vacinación “aos nove meses ou, como máximo, ao ano da segunda”.
Desta forma será como se garanta a protección fronte ao virus a longo prazo. Segundo aclarou nun encontro con correspondentes dalgúns medios na Alemaña, os estudos que se están a realizar amosan unha caída da inmunidade “co paso dos meses”.
Así, o científico non só falou desa terceira dose, senón que resaltou que “probabelmente” tamén haxa que renovar o remedio cada ano ou ano e medio, como vén sucedendo coa gripe. Tendo en conta o contido do contrato da UE para a distribución desta patente, semella que os ingresos serían constantes.
A creada en Alemaña foi a primeira fórmula de inmunización aprobada que integra o ARN mensaxeiro para dar resposta ante os ataques do virus. Até o de agora adminístrase en dúas doses que van separadas só por 21 días, salvo atrasos na organización.
Mais, Sahin incidiu en que os ensaios clínicos practicados a unhas 40.000 persoas demostran que hai un control dos contaxios ao 95%. Ao longo do tempo esa porcentaxe de efectividade vai caendo, polo que se precisa a terceira parte da vacina “para aumentar a inmunidade de novo e situala preto do 100%”.
Curiosamente este fármaco, para o que agora xorden puntualizacións, é a aposta da Unión Europea para compensar os problemas xurdidos coa AstraZeneca, malia que no Estado español só se axustou un pouco o grupo de poboación ao que vai dirixido este último medicamento.
Respecto da variante india que asusta agora ao mundo, o representante da tecnolóxica só acertou a dicir que ten a confianza en que o remedio teña éxito. “Xa estudamos outras dúas mutacións e a nosa vacina funcionou coas dúas, algo que fornece confianza”, resumiu.