Máis un golpe xudicial á Xunta da Galiza no que vai de ano. Após anular en xaneiro o Tribunal Superior de Xustiza da Galiza (TSXG) o proxecto de repotenciamento do parque eólico Corme, en Ponteceso, e o Supremo ratificar, en febreiro e outubro respectivamente, a anulación das licenzas dos proxectos Sasdónigas —Mondoñedo— e Oribio —Samos e Triacastela—, agora o TSXG vén de paralizar, cautelarmente, o parque Bustelo —Carballo e Coristanco—.
Así o notificou hai escasos minutos a asociación ecoloxista Adega, nun comunicado no que informa de que o recurso presentado contra este proxecto de Greenalia foi estimado pola Xustiza galega.
Adega e a Plataforma pola Defensa da Cordilleira Cantábrica (PDCC), entidade da que fai parte, recorreran as autorizacións por parte da Xunta dos parques Bustelo, Campelo e Monte Toural, proxectados en Carballo, Coristanco, Santa Comba e Tordoia, ao considerar que se trataba dunha "fragmentación artificial" dun mesmo proxecto, cuestión da que xa informara Nós Diario o pasado ano.
O TSXG xa decretara a comezos de outubro a paralización cautelar doutro dos tres proxectos recorridos e que conforman este complexo de xeración de enerxía eólica, o de Campelo.
O auto, datado do 6 de outubro deste ano, "reitera os argumentos xa esgrimidos" en relación á mesma medida decretada para o proxecto Campelo, apuntan desde Adega, ao entenderen os xuíces que "non se pode ignorar que os defectos de publicación e audiencia que alega a letrada da actora xa deron na estimación de dous recursos nos que, con fundamentos nas mesmas normas, se alegaba tal deficiencia".
Adega e a PDCC amparábanse no seu recurso "na concorrencia da fragmentación artificial dos proxectos, contraria ao dereito comunitario; nas irregularidades en canto ao desenvolvemento dos trámites de información pública dos proxectos, reducidos a quince días e nos que non se puxeron a dispor da cidadanía os informes sectoriais correspondentes, e na súa incompatilidade coa preservación ambiental".
Campaña de recadación
Porén, precisan as ecoloxistas, a efectividade desta suspensión cautelar da autorización do parque Bustelo está condicionada ao depósito dunha "garantía" de 10.000 euros por parte das entidades recorrentes, no prazo de 15 días, a fin de "responder dos prexuízos de calquera natureza que puidesen derivarse da medida cautelar".
Así, deberán reunir un total 20.000 euros nas próximas dúas semanas, para o que esta mesma semana iniciarán unha campaña de recadación colectiva para facer fronte á imposición destas dúas caucións e concretar, deste modo, a paralización temporal do proxecto.