Na noite deste domingo a Consellaría de Sanidade deu conta de catro novos falecementos de persoas diagnosticadas coa Covid-19, todas elas na área sanitaria de Vigo, elevando deste modo o cómputo desde o inicio da pandemia a 2.770.
Un dos óbitos correspóndese ao 29 de decembro, nomeadamente un home de 84 anos. Outras dúas persoas, de 79 e 80 anos, finaron o día 30, mentres o 31 faleceu un cuarto home de 54. Todos eles tiñan patoloxías previas, segundo informa Sanidade.
Son, deste modo, 90 decesos no último mes, desde o pasado 3 de decembro, o que ofrece unha media de tres vítimas mortais por día.
Aliás, 90 foron as defuncións notificadas en relación a esta doenza entre os meses de setembro, outubro e novembro, cunha media de un pasamento diario.
Con todo, cómpre contextualizar os datos: se ben nos tres meses anteriores a decembro o pico máximo de casos activos ficou arredor dos 6.000, hoxe está perto dos 50.000, polo que a taxa de mortalidade é significativamente máis baixa.
Tamén coa entrada do novo ano, pola contra, hai máis de 200.000 persoas que superaron a enfermidade (en concreto, 202.825).
