En moitas ocasións diante dunha copa de viño preguntámonos a orixe dos seus aromas, o proceso polo que pasa até chegar a nós por escoller tal uva ou mesmo contar co algunhas marcas de referencia. Coa idea de resolver moitas destas dúbidas, Nós Diario iniciará o vindeiro 4 de xaneiro de 2022 un novo coleccionábel co nome de A nación dos mil viños da man de dous expertos sumilleres: Martiño Santos e Xosé Gontá.
Aprender a catar os viños da Galiza
A nova proposta do xornal é pór a disposición de todo o mundo a posibilidade de apreciar o sabor e xulgar as calidades dos diferentes viños que se fan na Galiza. A través de 16 entregas das terzas até as sextas feiras de xaneiro, a lectora e o lector poderá aprender a catar nunha inmersión completa no panorama vitivinícola da Galiza.
O curso de cata está pensado para escoller e gozar a botella en cada ocasión, contextualizado por vez primeira na cultura dos viños galegos. A través das súas páxinas achegarase a descubrir de onde veñen os aromas ou a saber como inflúe o clima no gusto. Darase información de primeira man de se pesa máis a zona ou a variedade da uva ademais de aprender a diferenciar os viños que empregan unha soa uva dos que empregan varias.
O curso descubrirá de que viñas saen bos os viños e a relación entre como se fan e a que saben. De maneira sinxela introducirá datos do mundo da cata para entender cada viño, como que matices ten cada zona. Por último, poñerá caras a marcas de interese, ademais de coñecer o pasado e o potencial dos viños galegos.
Os autores e o seu proxecto enocultural
Martiño Santos e Xosé Gontá, os autores, son dous expertos sumilleres que en 2013 deron vida ao proxecto Vide, Vide! en Compostela.
Partindo, daquela, dunha viaxe en autocaravana coa que percorreron todo o país visitando adegas e coñecendo viticultores, crearon un espazo enocultural que xa é un referente na capital galega.
Ademais de contar cunha ampla tenda física no centro de Compostela para a venda directa, contan cunha variada axenda de actividades relacionadas dalgunha maneira coa cultura vitivinícola galega, entre as que figuran algunhas catas e presentacións que realizan no propio espazo.