A que fora xerente do Hospital da Mariña, situado en Burela, Carmen Durán, foi a encargada de dar conta dos datos de incidencia da Covid-19 nos puntos que máis lle preocupan á Consellaría de Sanidade na Galiza. Fíxoo como directora xeral de Saúde Pública, cargo que ocupa a raíz das mudanzas que supuxo a chegada de Julio García Comesaña a este departamento.
En castelán e deturpando topónimos en varias ocasións -foi significativo o uso reiterado do nome ilegal La Coruña para se referir á Coruña-, Durán informou de que o nivel de incidencia na Galiza é, a sete días, de 154,76 por cada 100.000 habitantes, unha cifra que a semana pasada se atopaba en 137, e de 265,98 a 14 días. A media estatal, afirmou, atópase en 227 por cada 100.000 habitantes nos últimos sete días e en 452 nos últimos 14 días.
Sobre estas cifras baseou o comité clínico a decisión de estabelecer medidas restritivas máis duras.
A incidencia, salientou, concéntrase principalmente nas cidades.
Deu o dato da comarca da Coruña: 79,3 por 100.000 habitantes nos últimos sete días e 129 nos últimos catorce. A Coruña cidade conta con 129 nos últimos sete días e con 227 nos últimos 14. En Arteixo, nos últimos 14 días, dixo rexistráronse 78 casos.
Tamén salientou o caso de Vimianzo, cuxa evolución preocupa ao Sergas. Nos últimos sete días hai 50 novos casos.
A respecto da comarca de Compostela, asegurou que xa se percibe o efecto das medidas adoptadas, mais a incidencia segue a ser alta. Citou o caso da capital, cunha incidencia de 234 nos últimos sete días e de 457 nos últimos 14 días.
Na comarca de Ferrol a incidencia está en 284 nos últimos sete días e en 393,5 nos últimos 14.
En relación a Lugo, situou a incidencia a sete días de 204, cando a semana pasaba a incidencia acumulada a sete días era de 134.
A respecto da comarca de Ourense, puxo de manifesto que as restricións aplicadas “están dando os seus froitos”, aínda que non se está, dixo, en niveis óptimos”. Segue a ter unha incidencia a sete días de 153 e a catorce días de 295.
As novas noticias, salientou, veñen da man da comarca de Verín. Expuxo que hai unha semana a incidencia a tres días (aquí non ofreceu o dato de sete días) era de 129 e agora é de 99 e a incidencia acumulada a 14 días hai unha semana era de 192 e agora é de 156.
No Carballiño, a incidencia acumulada a sete días baixou dos 117 da semana previa aos 72 e a incidencia acumulada a 14 días pasou de 240 da última semana a 189.
En relación á comarca de Pontevedra, ofreceu as cifras da cidade. A semana pasada a incidencia acumulada a sete días era de 140,5 e na actualidade a incidencia acumulada a sete días é de 206.
Sobre Vigo, afirmou que a cidade "preocupa". O nivel de incidencia pasou de 115 a 176 (non informou de se se trataba da acumulada a sete días ou a 14).