Máis de 170 millóns de mulleres en todo o mundo padécena. Na Galiza, estímase que lle afecta a 60.000 e que 9.000 posúen o grao máis grave. É a endometriose, unha doenza que consome por dentro e provoca dores extremas. A enfermidade consiste no crecemento anómalo do endometrio e segue a ser unha gran descoñecida fóra de quen a padece e os seus círculos máos próximos.
Esta doenza crónica pode afectar múltiples órganos do corpo: ovarios, útero e trompas as máis frecuentes pero tamén aparato urinario, dixestivo, pulmonar ou aparecer na epiderme sobre unha cicatriz dunha antiga operación, no embigo….
Unha das características é que a padecen as mulleres. Por iso a campaña ‘A outra cara da Endometriose?" da asociación querENDO Mulleres con Endometriose, "coa que damos a coñecer as vivencias das mulleres afectadas a través dos homes que nos rodean; poñendo o foco no nesgo de xénero que presenta a medicina actual”.
Unha campaña, sinala a asociación, coa que se pretende poñer de manifesto a diferenza de atención e de acceso que existe na medicina nacendo homes ou mulleres.
“Os testemuños que ofrecen os nosos acompañantes son os nosos propios testemuños, que a día de hoxe seguen a ter un maior impacto na sociedade se os sufrise un home que se os sufrimos 1 de cada 10 mulleres en idade fértil; pois a eles nunca os poderiamos imaxinar nunha situación de desamparo por parte dos servizos de saúde, así coma dos centros de investigación”.
A asociación sinala que con esta campaña pretenden, para alén de crear un “impacto social”, amosar a existencia dese “nesgo de xénero” e “reivindicar máis investigación e mellor atención ás mulleres con Endometriose”.
