Milleiros de persoas congregábanse ás 12.00 da mañá na Alameda de Compostela mais nada semellaba avanzar o que viría despois. Unha maré humana colapsou as rúas da capital da Galiza para rexeitar ao unísono a política mineira que están a promover as empresas transnacionais "coa cumplicidade da Xunta de Galiza". Así o manifestaban desde a Rede de colectivos contra a minaría salvaxe a poucos minutos de comezar a mobilización.
Isabel Vilalba, secretaria do Sindicato Labrego Galego (SLG) e unha das portavoces da Rede ContraMINAcción denunciou as consecuencias medioambientais do que considerou unha "política colonial como a que xa se desenvolveu noutros lugares". Unha política que "cada vez mais", apuntou "a sociedade rexeita".
Contra as políticas coloniais
E o certo é que as voces clamaron contra este modelo ao berro de "Estamos fart@s de ser unha colonia", na que empresas foráneas ás que "non lles preocupa o noso país", advertían @s manifestantes, "expolian os nosos recursos" deixando tan só "un grande buraco, cada vez máis e máis profundo" denunciaron @s voceir@s das plataformas que desde todos os puntos do país exixiron a parálise dos proxectos mineiros en curso e, daqueles, que se prevé aprobará o plan sectorial de actividades extractivas da Xunta de Galiza.
"É unha patente de corso", denunciaron desde Verdegaia. Un cheque en branco para "que as empresas mineiras poidan facer o que lles dea a gaña" pasando por enriba "de aclquera figura de protección do medio". Nin ríos, nin espazos protexidos como a Rede Natura, nin tan sequera aqueles espazos de alto valor ecolóxico e agrogandeiro que salvagardan o futuro das comarcas do interior do país. A nova norma impulsada pola goberno de Alberto Núñez Feijóo quere favorecer “a apertura en canal do noso país”, sentenzou o portavoz nacional do Bloque Nacionalista Galego, Xavier Vence.
O líder nacionalista criticou con dureza que se estean a aprobar proxectos mineiros –como os de Corcoesto-- “sen ter mesmo aprobado o propio plan” --actualmente en proceso de exposición pública. “É un despropósito” que revela, dixo, “as urxencias” do executivo galego por responder aos “intereses das empresas mineiras” en troca dos de todo o país.
"Galiza non se vende, se cultiva e se defende"
Mais “Galiza non se rende” nin “se vende”. Clamaron os milleiros de persoas que se achegaron á capital da Galiza para rexeitan a política mineira da Xunta mais tamén a “sede de ouro” das transnacionais.
“A Terra cultívase e deféndese”, respostaban @s manifestantes que deron as costas á minaría salvaxe para reivindicar o dereito a protexer “o futuro das comarcas” fronte “o capital especulativo” .
"Nin mina nin cianuro, queremos aire puro", entoaban milleiros de persoas ao seu paso pola Praza de Galiza. O centro neurálxico das mobilizacións ficou pequeno para acoller a manifestación que á metade do seu percorrido aínda albiscaba as comitivas saíndo da Alameda. Ao tempo que centos de manifestantes comezaban a encher a Quintana.
Máis de media hora de diferenza entre a chegada da cabeceira da manifestación até a entrada das últimas comitivas que, xa, non collían nunha praza ateigada. Ao pé da catedral, ducias de faixas vindas de todos os recunchos do país e portadas por máis de 40 organizacións, daban comezo a un acto final interrompido polos berros d@s participantes que clamaban a prol da resistencia dun "pobo unido" que "xamáis será vencido", afirmaron.
Representantes das plataformas en defensa do territorio acompañaron @s artistas Sés e O'Leo, encargad@s de pór a nota musical a unha mobilización chea de cor. Porén, @s protagonistas foron todas e cada unha das comarcas e localidades do país que están en loita contra proxectos megamineiros aprobados ou a piques de se aprobar.
Ducias de voces que reclamaron o dereito de Galiza a defender "a súa dignidade" dicindo non á minaría salvaxe. Agora, a pedra está no tellado dunha Xunta de Galiza que deberá dicir de que lado se pon. "Ou a mina, ou nós".