O Consello Xeral do Poder Xudicial fixo públicos esta segunda feira (19 de outubro) os dados referidos aos procesos xudiciais por violencia machista. Neste senso, na Galiza presentáronse no segundo trimestre de 2015, 1.312 denuncias, a maior parte delas (974) através dun atestado policial con denuncia da vítima.
Delas, 656 foron procesadas e outras 656 sobreseídas. Isto é, o 49,9%, a metade foron suspendidas xudicialmente, maioritariamente (624) "por non resultar xustificada a perpetración do delito". Trátase do territorio con maior taxa de sobreseimento (libre ou provisorio) do conxunto do Estado español, xunto con Castela e León.
As denuncias presentadas respondían a "lesións e malos tratos" correspondéndose cos artigos 153, 173 e 148 do Código Penal; delitos contra a liberdade e indemnidade sexual.
Aliás, ditáronse 249 ordes e ou medidas de protección dun total de 397 solicitadas no 82,62% dos casos polas propias vítimas fronte ao 13,6% das requeridas polo Ministerio Fiscal.
No segundo trimestre de 2015 foron axuizadas por violencia machista 172 homes dos que 132 foron condenados e 40 absoltos. A ratio de denuncias por cada 10 mil mulleres sitúase na Galiza en 9,3.
