O portavoz da Sociedade Española de Médicos Xerais e de Familia, o lucense Lorenzo Armenteros, criticou esta terza feira por "precipitada" a eliminación do uso obrigatorio de máscaras en interiores a partir da próxima segunda feira, 18 de abril.
"Mantivémolo desde que se empezou a rumorear: non se reunían as condicións e seguen sen reunirse porque aínda estamos cunha incidencia por Covid moi alta e existe un risco alto", explicou.
A xuízo de Armenteros, o que se pretende agora é depositar "a responsabilidade no paciente e na persona enferma", o que "deixa só como responsábel a cadaquén". "E isto parécenos unha opción moi perigosa", apostilou.
O portavoz dos médicos xerais e de familia insistiu en que a eliminación do uso obrigatorio da máscara en interiores é "unha decisión moi arriscada" e que "pode incrementar o número de contaxios ao longo do tempo".
O facultativo lucense tamén censurou que "se reduciu a información de tal maneira que xa nin se contan os tests de antíxenos", o que leva "a un apagamento informativo relativo ao número de casos que pode levar a unha información errónea e unha falsa redución do número de casos activos que non sería así se se dese unha información completa".
Ademais, Armenteros queixouse da "relaxación funcional" producida nas últimas semanas. E vincúlao a que "todo o mundo está con moitas ganas de que desapareza a máscara". "Estabamos a ver que o número de casos se incrementa en familias enteiras que se contaxian por esa relaxación", alertou.
"Hai tempo que dicimos que a familia dá unha falsa sensación de seguridade ante a posibilidade de contaxios. Se isto ocorre na familia, imaxinemos o que pode ocorrer no traballo ou nos medios nos que nos movemos sen usar a máscara como até o de agora", advertiu finalmente o doutor.