Vixilancia Penitenciaria tiña que decidir entre dúas opinións distintas. A da Xunta de Tratamento do centro penitenciario de Villabona (Asturias), onde cumpre condena Dorado, favorábel á concesión do permiso. E a da Fiscalía Antidroga, contraria por considerar que existe alarma social e risco dun hipotético quebrantamento da condena.
Finalmente, o xuíz de Vixilancia Penitenciaria acabou optando por lle dar dar a razón ao centro penitenciario e por conceder o primeiro permiso a Dorado para saír da cadea en oito anos.
O narcotraficante cumpre unha condena de 10 anos por narcotráfico e outra de seis por branqueamento de diñeiro.
Dorado é célebre quer polas súas actividades delictivas quer pola súa antiga amizade co presidente da Xunta, co que partillou viaxes de lecer nos anos 90 do pasado século.
O permiso outorgado a Dorado por Vixilancia Penitenciaria é o primeiro chanzo dun proceso que o levará a acceder ao terceiro grao penitenciario como "preparación para a vida en liberdade", segundo reza o auto do xuíz.
O xuíz entende que o narco "reúne todos os requisitos necesarios para obter o permiso de saída, é máis, cumpriu con exceso unha cuarta parte da condena (desde 4 de xullo de 2011) e a metade superouna a 20 de febreiro de 2016".
Canto á hipótese de quebrantamento da condena -segundo as táboas que manexan as autoridades penitenciarias o risco situaríase en 50 por cento-, o xuíz non a considera a eventualidade máis probábel, sendo que "o interno goza de apoio familiar e expectativas de futuro e que cando estivo en liberdade provisoria non se produciu ningunha incidencia nen intento de evasión pese ás causas pendentes".
