Os datos actualizados na mañá da sexta feira pola Consellería de Sanidade, con rexistros até as 18 horas da quinta, indican que hai 26 pacientes Covid ingresados en UCI, un máis, e 169 noutras unidades, 12 máis.
Por áreas sanitaria, a presión hospitalaria sobe en catro: A Coruña e Cee; Ourense; Santiago e Barbanza e Vigo; mentres que se mantén na de Lugo; e baixa nas de Ferrol e Pontevedra e O Salnés.
En concreto, na área da Coruña e Cee seguen sete pacientes Covid en UCI, pero soben a 56 os ingresados noutras unidades -catro máis-; así como na de Vigo, onde catro persoas permanecen en críticos e aumentan a 34 as hospitalizadas noutras unidades -catro máis-.
Pola súa banda, na de Ourense increméntanse a cinco os pacientes Covid en UCI -dous máis- e a 16 os doutras unidades -un máis-; mentres que na de Santiago e Barbanza aínda que baixan a tres o críticos -un menos-, soben a 26 os que permanecen noutras unidades -cinco máis-.
En canto á de Lugo, non experimenta cambios e continúa con tres en UCI e oito noutras unidades. Mentres, na de Pontevedra e O Salnés seguen catro en críticos e descenden a 21 os doutras unidades -un menos-. E a área de Ferrol prosegue como a única da Galiza sen ingresados Covid en UCI e reduce a oito os hospitalizados noutras unidades -un menos-.
Máis casos activos
En canto aos casos activos, Galiza encara un novo alivio nas restricións cun aumento por oitava xornada consecutiva, ao situarse en 2.523, o que supón 84 máis que a xornada anterior. Iso débese a que houbo máis contaxios (229) que altas (145).
Por áreas, as infeccións activas soben en seis das sete áreas: Pontevedra e O Salnés (+32); Vigo (+17); Santiago e Barbanza (+16); Ourense (+12); A Coruña e Cee (+6) e Ferrol (+4), mentres que na de Lugo descenden lixeiramente en tres.
A área sanitaria de Vigo mantense á cabeza en número de casos activos con 642; seguida da da Coruña e Cee, con 608; Pontevedra e O Salnés, con 407; Santiago e Barbanza, con 379; Ourense, con 217; Lugo, con 173; e Ferrol segue á cola, con 97.
Vigo, á cabeza en contaxios
Os novos contaxios disparáronse e superaron, como sucedeu o sábado pasado, a barreira dos 200 até alcanzar os 229, despois de iniciar esta semana con 126, repuntar a 165 a terza feira, descender lixeiramente a 158 a cuarta e volver aumentar a 199 a quinta.
Segundo os últimos datos actualizados, confirmáronse 199 positivos con PCR nas últimas 24 horas, 22 máis que a xornada anterior, coa área de Vigo á cabeza, con 57; seguida da Coruña e Cee, con 45; Pontevedra e O Salnés, con 40; Santiago e Barbanza, con 29; Ourense, con 12; Lugo, con 10; e Ferrol, con seis.
No que respecta á taxa de positividade, descendeu a un 1,9% após manterse nun 2% o resto da semana despois de baixar na segunda feira a un 1%, polo que segue por baixo do 5% que a Organización Mundial da Saúde (OMS) fixa para dar por controlada a pandemia.
A pandemia deixa até a data en toda a Galiza 2.371 persoas falecidas diagnosticadas coa Covid-19, ao non notificar Sanidade novas vítimas desde a cuarta feira.