As galegas e os galegos maiores de 16 anos poderán cambiar desde esta quinta feira 2 de marzo o seu nome e o seu sexo no Rexistro Civil sen ningún requisito, máis que o desexo expreso do solicitante, coa entrada en vigor da Lei trans. Os menores de entre 14 e 16 anos precisarán consentimento dos seus titores.
O texto da norma, aprobada polo Congreso hai dúas semanas, publicarase previsibelmente hoxe no Boletín Oficial do Estado (BOE), segundo adiantaron fontes gobernamentais, e entrará en vigor ao día seguinte da publicación, esta quinta feira.
Esta lei modifica o texto aprobado en 2007 durante o Goberno socialista de José Luís Rodríguez Zapatero, que exixía para o cambio rexistral polo menos dous anos de hormonación e unha diagnose médica que acreditara unha disforia de xénero.
Catro meses de trámites
Coa publicación da lei hoxe no BOE, mañá bastará con que, quen así o desexe –e sexa maior de 16 anos–, solicite un cambio rexistral por escrito, sen necesidade de presentar probas ou testemuñas.
A decisión deberá ser ratificada polo solicitante tres meses despois, mentres que a Administración terá un mes máis de prazo. Segundo isto, o proceso durará un máximo de catro meses.
